أخت جوزي فرحها بعد شهر وحماتي قالتلي تعالي يا نجلاء نشوف جهاز العروسة ونكتب الحاجات اللي ناقصة عشان نلحق نشتريها قبل الفرح فرحت إني هقدر أساعدهم وقلت في نفسي دي أخت جوزي وفي مقام أختي الصغيرة ومينفعش أتأخر عنها في حاجة
رحت بيت حماتي وفتحنا كراتين الجهاز واحدة واحدة وفضلنا نراجع الملايات والمفروشات والأطقم والصيني والحلل وكل حاجة موجودة في الجهاز لحد ما خلصنا وكتبت كل النواقص في ورقة عشان ننزل نشتريها
كنت قاعدة على الأرض بلم الحاجات اللي طلعناها لما دخلت أخت جوزي اسمها ريهام وقالت لأمها
بصي يا ماما أنا اتفقت مع سلمى أخت العريس إن إحنا الاتنين بس اللي هنروح نفرش الشقة ومش عاوزة حد تاني ييجي معانا
حماتي بصت لها وهزت راسها وقالت
عندك حق يا بنتي أحسن كده بلاش زيطة ووجع دماغ
رفعت عيني وبصيت لهم باستغراب وقلت
يعني إيه يا جماعة مش فاهمة هو أنا مش هاجي معاكم؟ ده أنا من الصبح قاعدة أساعدكم وبكتب كل حاجة ناقصة عشان نلحق نجهز الشقة
ريهام بصتلي من فوق لتحت وقالت بمنتهى البرود
بصي يا نجلاء أنا هقولك حاجة ومش عاوزاكي تزعلي مني إنتي هتدخلي بيت أهل جوزي إزاي بلبسك ده؟ وإنتي وعيالك هتلبسوا إيه في الفرح؟ أنا مش عاوزة حد يبصلي بصه تضايقني يوم فرحي
حسيت إن حد صب عليا ميه ساقعة
بصيت لها وقلت
إنتي بتقولي إيه يا ريهام؟ هو أنا عمري قصرت معاكي في حاجة؟ ده أنا كنت بعتبرك أختي وبعمل كل اللي أقدر عليه عشان أفرحك
ردت عليا وهي بتظبط شعرها قدام المراية
أنا مقولتش إنك قصرتي معايا بس كل واحد لازم يعرف إمكانياته يا نجلاء وفرحي مش ناقص إحراج
ساعتها مقدرتش أسكت وقلت لها
عيب الكلام ده يطلع منك إنتي بالذات لأنك عارفة ظروف أخوكي كويس وعارفة إنه رجله مكسورة وعامل عملية شرائح ومسامير ومش قادر ينزل شغله من شهرين وإحنا بالعافية بندبر مصاريف العلاج والبيت
يعني إنتي عاوزانا منجيش فرحك عشان خايفة من شكلنا قدام أهل جوزك؟
ردت عليا من غير ما ترمش بعينيها وقالت
أيوه يا نجلاء ياريت متجيش إنتي وعيالك عشان أنا مش ناقصة مشاكل يوم فرحي
بصيت لحماتي مستنية منها كلمة واحدة تدافع عني أو حتى تقول لبنتها عيب اللي بتعمليه لكن الصدمة إنها قالتلي
خلاص يا بنتي كبري دماغك وروحي بيتك بدل ما الموضوع يكبر وإحنا لسه قدامنا تجهيزات كتير
قمت من مكاني وأنا حاسة إن كرامتي اتدهست قدامهم وخدت شنطتي ومشيت من غير ما أقول كلمة
وصلت شقتي ولقيت جوزي محمود قاعد على الكنبة ورجله مرفوعة على مخدة كبيرة والعكازين جنبه
أول ما شاف وشي عرف إن في حاجة حصلت وقاللي
مالك يا نجلاء؟ إنتي كنتي رايحة تساعدي أمي وريهام إيه اللي حصل؟
قعدت جنبه وحكيتله كل كلمة اتقالتلي وأنا بعيط ومش مصدقة إن أخته اللي كنت بشيلها فوق راسي ممكن تهيني بالشكل ده
محمود فضل ساكت شوية وبعدها وشه اتغير وقاللي
يعني أختي مش عاوزاكي تحضري فرحها إنتي وعيالك عشان لبسكم مش على مزاجها؟
هزيت راسي وقلتله
والله ده اللي حصل يا محمود وأنا مش زعلانة عشان الفرح قد ما أنا موجوعة عشان الكرامة اللي اتهانت
مسك tليفونه واتصل بأخته ولما ردت عليه قالها بصوت عالي
إنتي يا ريهام شايفة إن مرات أخوكي وولاد أخوكي منظرهم يكسفك قدام الناس؟ طب إنتي نسيتي مين اللي كان بيساعدك في جهازك من الصبح؟ ولا عشان أنا رجلي مكسورة ومش قادر أنزل شغلي بقيتوا شايفين نفسكم علينا؟
ريهام حاولت ترد لكنه مقاطعهاش وقال
اسمعي بقى يا ريهام أنا ومراتي وعيالي مش هنحضر فرحك ولا هنقف على باب حد عشان يسمح لنا ندخل بيته وإنتي من النهارده تعرفي إن كرامة مراتي من كرامتي
وقفل التليفون في وشها
قربت منه ومسكت إيده وقلتله
أنا مش عاوزة أخسرك أهلك يا محمود ومش عاوزة أكون سبب في قطيعة بينكم
بصلي وقال
إنتي مش السبب يا نجلاء واللي يهينك يبقى هو اللي اختار يبعد عننا
عدى يومين والبيت هادي بشكل غريب ومحمود لسه مش قادر يتحرك كويس وأنا بحاول أوفر مصاريف البيت والعلاج من أي فلوس موجودة معايا
وفجأة تليفوني رن وكان المتصل خالي الحاج عبد الرحمن اللي عايش بره مصر وعنده شركة كبيرة للتوريدات
رديت عليه وقلتله أيوه يا خالي
لكن صوته جه مختلف عن كل مرة وقاللي
إنتي مخبية عليا إيه يا نجلاء؟ أنا عرفت اللي حصل معاكي ومع جوزك وعرفت أخت جوزك قالتلك إيه
حاولت أغير الموضوع لكنه أصر إني أحكيله كل حاجة ولما خلصت كلامي سكت شوية وبعدها قاللي
اسمعيني كويس يا بنت أختي إنتي وجوزك مش هتفضلوا في الضيقة دي كتير وأنا عندي ليكم مفاجأة محدش في العيلة كلها يتوقعها
قلتله بقلق
مفاجأة إيه يا خالي؟
ضحك وقال
أنا نازل مصر بكرة ومعايا قرار لو اتنفذ زي ما أنا مخطط له حياة محمود وحياتك هيتغيروا تمامًا لكن أوعي تقولي لحد كلمة واحدة لحد ما أوصل
قفلت معاه وأنا مش فاهمة إيه اللي بيخطط له
لكن اللي مكنتش أعرفه إن خالي كان مجهز مفاجأة أكبر بكتير من مجرد شغل أو فلوس
وفي نفس الليلة حماتي اتصلت بيا وقالتلي بصوت متوتر
يا نجلاء إنتي تعرفي إن خالك عبد الرحمن نازل مصر بكرة؟
وقبل ما أرد عليها سمعتها بتقول جملة خلت قلبي يقف من مكانه
#الكاتب_رومانى_مكرم_
