كمال بلع ريقه بتوتر، ومسح العرق من على جبينه بإيده، وطلع ورقة بيضا مطوية من جيبه الداخلي: “يا فندم الكلام ده كله كدب وافترا، البيت ده ملكي خالص، والدي باعهولي قبل وفاته بعقد بيع قطعي ومبرم بيني وبينه، وأختي خدت حقها زمان وهي بتتجوز، والورقة دي تثبت إن البيت بيتي، ومن حقي أمنع أي حد يدخله حتى لو كانت أختي!”.
وكيل النيابة مد إيده وأخد الورقة، بص فيها بتمعن ورفع نضارته، بص لتاريخ العقد اللي كمال كان كاتبه، وفجأة ملامحه اتقلبت للغضب وبص لكمال بنظرة شلّت حركته مكانه في ثانية.
الجزء السادس (قبل الأخير) ⬇️الباب لما اتفتح وطار القفل على الأرض، شافت عيني اللي مكنتش أتوقعه في أسوأ كوابيسي.. جوة الصالة كان واقف طليقي “سعيد”، ومعاه اتنين رجالة من قرايبه بأشكال تخوف، قاعدين على الكنب والهدوم مرمية في كل حتة وسجايرهم مولعة وريحتها قالية الشقة. أول ما شاف البوكس والقوة داخلة، قام وقف بسرعة ورمى السيجارة من إيده، ووشه اتخطف للحظة قبل ما يرجع يلبس قناع البجاحة. الظابط طلع سلاحه نص طلعة من جرابه، وزعق بصوت خلا الجدران تتهز: “مين إنت وهو؟! بتعملوا إيه في شقة متنازع عليها وصادر ليها قرار تمكين فوري من النيابة العامة؟!”.
سعيد حط إيده في جيبه وطلع ورقة بيضا متطبقة، وابتسم ابتسامة صفرا وهو بيبصلي من فوق لتحت باستهزاء: “أنا مستأجر يا باشا.. مستأجر بعقد إيجار قديم وموثق، الأستاذ كمال أخوها أجرلي الدور ده بالكامل من شهرين بمقدم تلات سنين، والمحل اللي تحت كمان، وإحنا قاعدين هنا بوضع يد قانوني، والقانون لا يحمي المغفلين!
في اللحظة دي فهمت اللعبة القذرة اللي رتبها كمال وإنعام مع طليقي.. كمال كان عارف إن الورق في صفي وإن كدبته مش هتعيش، فراح استقوى بطليقي اللي رماني في الشارع، باعله واداله عقود وهمية عشان يحط رجله في البيت، ويتحول النزاع من خلاف بين أخ وأخته لقضية طرد مستأجر تاخد عشر سنين في المحاكم! طليقي كان بيبصلي وعينيه كلها شماتة وغل، عايز يذلني بالعيال وياخد منهم اللقمة ويخليني ألف في الشوارع كعب داير.
يوسف ابني أول ما شاف أبوه اترعش ووقف ورا ضهري ومسك في عبايتي، خايف من الإيد اللي كانت بتنزل عليه بالحزام كل يوم. المحامي رأفت قرب من الظابط بهدوء، وأخد عقد الإيجار من إيد سعيد وبص فيه بتركيز شديد، وفجأة ضحك بصوت عالي سمّع العمارة كلها. بص لسعيد وقاله بسخرية: “إنت فاكر نفسك ناصح إنت والمحبوس اللي في القسم؟
أولاً العقد ده متسجل بتاريخ لاحق لوفاة المورث ومن غير إعلام وراثة رسمي، ثانياً والأهم.. العقار ده عليه قرار إزالة جزئي للدور التالت وترميم للدور التاني صادر من حي وسط من سنة، ولا يجوز قانوناً تأجيره ولا تحرير أي عقود انتفاع عليه إلا بموافقة كل الورثة وإشراف الحي!”.
المحامي لف للظابط وقال بحسم: “يا فندم، دول مش مستأجرين، دول بـ،،لـ،ـطـ،ـجـ،ـيـ،ـة كمال جايبهم لوضع اليد وتعطيل تنفيذ قرار قضائي واجب النفاذ بالقوة الجبرية، والقرار معاك صريح بطرد أي شاغل للعين دون سند قانوني معتمد من النيابة وتسليمها للشاكية خالية من الأشخاص والشواغل!”.
الظابط ملامحه اتحولت للغضب، وشاور للعساكر: “حط الكلبشات في إيد التلاتة دول فوراً!
