واحد يبعت ٢٠٠ جنيه، واحدة تبعت ٥٠٠، حد يقول مش معايا غير ١٠٠، وحد تاني يبعت ألف ويقول ربنا يشفيها.
والحكاية كبرت بشكل محدش كان متوقعه.
سمر كانت كل شوية تدخل تقول لنا: “لسه ناقص كذا”، وبعدها تقول: “جزاكم الله خير، أنا مش عارفة أشكركم إزاي”، وتحكي لنا إن أمها تعبانة وإنها خايفة عليها، وإنها بتبات جنبها وإنها مش عارفة تعمل إيه.
وبصراحة، إحنا صدقناها.
كنت كل ما حد يسألني: “هي أمها حالتها إيه؟”
أقول له: “ادعوا لها، العملية قربت وربنا يقومها بالسلامة.”
لحد ما في يوم سمر دخلت علينا وهي فرحانة وبتعيط في نفس الوقت، وقالت لنا إنهم أخيرًا جمعوا المبلغ كامل وإن العملية هتتعمل.
كلنا فرحنا لها.
واحدة قالت لها: “ربنا يشفيها ويقومها بالسلامة.”
وواحدة تانية قالت: “أول ما تطلع من العملية طمنينا.”
وأنا قلت لها: “أهم حاجة تطمنينا عليها، إحنا بقينا حاسين إنها واحدة مننا.”
وفعلًا، بعدها بكام يوم دخلت وقالت لنا إن العملية تمت وإن أمها خرجت وإن حالتها بدأت تتحسن.
كلنا حمدنا ربنا، واعتبرنا الموضوع خلص على كده.
بس بعد كام يوم، حصلت حاجة صغيرة جدًا… حاجة محدش فينا كان متوقع إنها هتقلب الموضوع كله.
واحدة من بلدنا شافت المنشورات القديمة بالصدفة، وكانت عارفة عيلة سمر كويس.
دخلت وسألت سؤال بسيط جدًا:
“هو أنتم بتتكلموا عن مين بالظبط؟”
ردينا عليها إن دي أم سمر، وإنها كانت بتعمل عملية.
سكتت شوية، وبعدين قالت:
“أم سمر؟!”
وقالت جملة بعدها خلتني أحس إن الدم اتسحب من وشي…
لأنها قالت إن أم سمر أصلًا متوفية من سنين، وإنها ماتت وسمر كانت لسه طفلة!!
وقتها افتكرنا إن فيه سوء تفاهم، يمكن مرات أبوها، يمكن خالتها، يمكن واحدة ربتها وبتعتبرها أمها…
لكن اللي عرفناه بعدها كان أكبر من أي حاجة ممكن نتخيلها…
اتصلنا بسمر وطلبنا منها تيجي تقعد معانا، وفعلاً جت بعد كام ساعة، لكن أول ما دخلت وقعدت قدامنا، عرفت من وشوشنا إن الموضوع اتكشف، ومفيش فايدة من أي لف ولا دوران.
واحد من أصحابنا قال لها بعصبية:
“سمر، إحنا عايزين نفهم بس… أمك فين؟”
بصت في الأرض وسكتت.
كرر عليها السؤال:
“أمك اللي جمعنا لها الفلوس، واللي قلتي إنها عملت العملية… فين؟”
سمر عينيها اتمَلَت دموع وقالت:
“أمي ماتت من زمان.”
المكان كله سكت.
أنا حسيت إن وداني مش مصدقة اللي سمعته.
